Dalili za mimba kuharibika

Miskerieji ni kutoka au kuharibika kwa mimba kabla ya wiki 20 za ujauzito, mimba hii hutoka yenyewe bila kuwa na uchokozi wowote.

Kwa Tanzania mimba ikitoka kabla ya kufikisha wiki 28 za ujauzito huitwa miskerieji. Inakadiliwa kuwa asilimia 10 hadi 20 ya wajawazito hupata miskerieji, namba hii ni ndogo ukilinganisha na hali halisi kwa sababu mimba nyingi hutoka wakati mwingine mapema Zaidi na kudhaniwa ni damu ya hedhi ya kawada au hedhi kuchelewa.

Endapo mimba itatoka baada ya kipindi cha wiki 20 au 28 kama ilivyo Tanzania, tatizo hilo hufahamika kuwa Mtoto kufia tumboni.

Kutoka kwa mimba kumegawanyika katika aina nyingi ambazo zimezungumziwa sehemu nyingine kwenye tovuti hii.

Kumbuka katika mada hii kutoka kwa mimba kunamamanisha pia mimba kuharibika yenyewe

Visababishi

Vipo visababishi aina kadhaa vinavyoweza kupelekea mimba kutoka

Matatizo kwa mtoto

Matatizo ya kufanyika kwa mtoto kama vile madhaifu ya kromosomu ya mtoto

Matatizo kwa mama

• Kuwa na maambukizi ya magonjwa ya zinaa kama vile kaswende, UKIMWI, maleria, na Rubela

• Kuwa na ugonjwa wa kisukari ulioshindikana kudhibitiwa

• Matumiziya dawa aina mbalimbali zisizoruhusiwa kutumika wakati wa ujauzito kamaa misopostol n.k

• Matatizo ya usawa wa homoni mwilini

• Magonjwa ya tezi ya thairoidi

• Ajali au jeraha kwenye tumbo mfano kupigwa tumboni n.k

Matatizo ya mfuko wa kizazi

• Kuwepo kwa makovu au kuota kwa nyama nyama kwenye mji wa mimba mfano faibroidi

• Kutokujiweza kwa Shingo ya kizazi

• Matatizo ya maumbile ya mji wa mimba kama kizazi cha bikonyueti

Sababu gani hazisababishi mimba kutoka?

• Mazoezi wakati wa ujauzito kama vile kukimbia kulima na kuendesha baiskeli

• Kujamiana

• Kufanya kazi za kawaida, isipokuwa kufanya kazi kwenye sehemu zenye mionzi au kemikali.

Dalili za mimba inayotoka

• Maumivu makali ya tumbo la chini na maumivu ya mgongo, ya kubana yanayoongezeka jinsi muda unavyokwenda

• Matone ya damu nyekundu au iliyoganda kutoka ukeni

• Kutokwa na majimaji na tishu za mtoto ukeni

• Tumbo kutokuongeeka ukubwa licha ya miezi kwenda mbele

• Kupotea kwa mapigo ya moyo ya mtoto

• Mtoto kuacha kucheza tumboni

• Maumivu makali ya kichwa

Vihatarishi vya mimba kutoka

Umri

Kupata mimba kwenye umri Zaidi ya miaka 35 inaleta hatari kubwa ya kutoka kulinganisha na mimba ambazo zimetokea chini ya umri huo. Kupata mimba kwenye umri Zaidi ya miaka 35

kunaongeza hatari mara 20 zaidi ya miskerieji, umri wa miaka 40 huongeza mara 40 zaidi na umri wa miaka 45 huongeza hatari mara 80 zaidi tatizo la miskerieji.

Kuwa na historia iliyopita ya miskerieji

Kuwa na historia ya mimba kutoka mara moja au mbili

kunakuweka hatarini Zaidi kutokwa na mimba inayofuata. Unahitajika kufanyiwa uchunguzi ili kujua tatizo linalosababisha mimba kutoka kabla ya kupata mimba ingine.

Magonjwa sugu

Magonjwa sugu kama kisukari kisichodhibitiwahuchangia mimba kuharibika.

Matatizo ya mfuko wa kizazi

Kama kutojiweza kwa shingo ya kizazi na kizazi cha baikonyueti.

Uzito mkubwa

Kuwa na uzito mkubwa au uzito mdogo kupita kaisi (soma zaidi kuhusu BMI kujua kuhusu uzito mkubwa na uzito mdogo kupita kaisi kwenye sehemu nyingine kwenye tovuti hii)

Sumu

Kutoka kwenye uvutaji wa sigara na tumbaku pamoja matumizi ya dawa za kulevya.

Vipimo

Baadhi ya vipimo kama vile kipimo cha amniosentesisi kinachochukua sampuli kutoka ndani ya tumbo la ujauzito, kwa nadra huweza kusababisha mimba kutoka.

Madhara

Madhara ya kutoka kwa mimba endapo hayatatibiwa yamegawanyika katika sehemu mbili, madhara ya muda mfupi na madhara ya muda mrefu.

Madhara ya awali

• Kutokwa damu ukeni

• Maambukizi ya Bakteria kwenye kizazi

• Kuishiwa na Damu

Madhara ya baadae

• Maambukizi kwenye via vya uzazi

• Utasa

• Maaumivu makali ya kizazi na ya muda mrefu

• Kuathirika kisaikolojia

Namna ya kujikinga dhidi ya mimba kutoka

Inawezekana kuwa vigumu wakati mwingine kujikinga na mimba kuharibika endapo sababu hazifahamiki.

Kufanya mambo yafuatayo yanaweza kukuondoa kwenye hatari ya mimba kuharibika na kutoka

• Hudhuria kliniki kabla ya kupata ujauzito kupata ushauri wa daktari na vipimo mbalimbali.

• Jikinge na vihatarishi vinavyosababisha mimba kutoka

• Hudhuria kliniki baad ya kupata ujauzito kama ulivyopangiwa

• Kunywa dawa za nyongeza za mativitamini

• Punguza kiwango cha kahawa unachokunywa