Dalili za gono kwa mwanaume

Utangulizi

Gono ni ugonjwa wa zinaa unaojitokeza sana hasa kwa vijana, ugonjwa huu huambukizwa kwa njia ya ngono na mwenza mwenye maambukizi,  inaweza kuwa ngono ya uume na uke, uume na njia ya haja kubwa au ngono ya mdomo. Pia mama mwenye maaambukizi anaweza kumuambukiza mtoto wakati wa kuzaliwa.

Mwanume anaweza kuwa na gono na akaonesha dalili au asioneshe dalili yoyote. Endapo ataonesha dalili huwa za wastani na huweza kuchanganywa  na dalili za magonjwa mengine mfano UTI.

Je, ni zipi dalili za gono kwa mwanaume?

Kama ilivyoainishwa hapo awali, mwanaume anaweza kuwa na gono na akaonesha au asuoneshe dalili zozote. Endapo ataonesha dalili basi dalili hizo zitaonekana kulingana na sehemu iliyoathirika kama ifuatayo;

Gono inayoathiri via vya uzazi

Huathiri kibofu cha mkojo, mrija wa yurethra na korodani (hutokea kwa nadra), huwa na dalili hizi;

• Kuhisi hali ya kuungua kwa kibofu wakati wa kukojoa

• Maumivu wakati wa kukojoa

• Kutokwa na uchafu uumeni ambao unaweza kuwa na rangi nyeupe, njano au kijani

• Maumivu au kuvimba kwa korodani

Gono inayoathiri njia ya haja kubwa

Hutokea sana kwa wanaume wanaoshiriki ngono kinyume na maumbile na wenza wenye maambukizi, huwa na dalili hizi;

• Kutokwa na uchafu

• Maumivu

• Miwasho

• Kutoka damu au kupata choo chenye matone ya damu

• Maumivu wakati wa kujisaidia

Gono inayoathiri kinywa na koo

Huwapata wanaume wanaofanya ngono ya mdomo na wenza wenye maambukizi.

Mara nyingi maambukizi katika sehemu hii hayaambatani na dalili  zozote, hata kama dalili zitaonekana huwa ni vigumu kutofautisha dalili hizo na dalili zingine za magonjwa ya kinywa na koo , na hivyo utambuzi wake huwa mgumu na kuchelewesha matibabu.

Dalili hizi zinaweza kuonekana

• Maumivu ya koo

• Kuhisi mikwaruzo kwenye koo

• Kuhisi koo kukuaka

• Koo kuwa jekundu

• Homa

• Kuvimba kwa mitoki katika shingo