Dalili za tezi dume

Tezi dume kwa lugha ya tiba "Prosteti" ni tezi iliyo kwenye mfumo wa uzazi wa mwanaume, chini kidogo ya kibofu cha mkojo. Tezi hii hupitiwa katikati na mrija wa urethra unaotokea kwenye kibofu cha mkojo kwenda kwenye tundu la uume. Mrija huu kazi yake ni kutoa mkojo kutoka kwenye kibofu cha mkojo.

Kwa kawaida tezi ya prosteti huwa na ujazo na uzito wa gramu 25. Endapo tezi hii itakuwa Zaidi ya ukubwa huu huanza kusababisha dalili mbalimbali kulingana na ukubwa au ujazo.

Tezi ya prosteti hukua kwa jinsi mwanaume anavyoongezeka umri na ifahamike kuwa ni kawaida ukuaji huu kutokea na wala haimaanishi saratani au shida yoyote mwilini.

Dalili za tezi dume huanza kuonekana maranyingi kwenye umri wa miaka 50 na kuendelea kwasababu katika umri huu, tezi huwa imekuwa na hukua zaidi hivyo hupunguza au kuziba kabisa njia ya mkojo. Kukua kwa tezi dume kusikosababishwa na saratani kunaitwa Benaini prostatiki haipaplezia.

Dalili za tezi dume iliyovimba

• Kukojoa mkojo wenye mtiririko thaifu

• Mkojo kutoka kwa shida wakati wa kuanza kukojoa

• Kutumia nguvu ili mkojo utoke wakati wa kojoa

• Kukojoa mara kwa mara wakati wa usiku

• Mkojo kuendelea kutoka kidogokidogo baada ya kumaliza kukojoa au matone ya mkojo kuendelea kutoka

• Mkojo kushindwa kutoka hata wakati mtu anapohisi kukojoa

• Hisia za kibofu kujaa mkojo wakati wote

• Hali ya kujihisi kukojoa mara kwa mara na kwa gafla