Maumivu ya kifua, kifua kubana, kifua kuwa kizito

Kubana kwa kifua huwa ni ishara ya hali na magonjwa mbalimbali, baadhi ya magonjwa huwa ya hatari Zaidi, mfano magonjwa ya moyo na mapafu na baadhi huwa si ya hatari Zaidi.

Kifua kubana au kupata maumivu ya kifua haimaanishi moja kwa moja kwamba kuna shida kwenye mapafu, bali inamaanisha kuna tatizo lolote linaloweza kutokea kwenye mfumo wowote ndani ya mwili.

Pamoja na dalili ya kifua kubana, kuna dalili zingine zinazoweza kuambatana na zikapelekea daktari wako kujua ni nini hasa chanzo cha maumivu ya kifua au kifua kubana.

Baadhi ya sababu zinazopelekea kifua kubana na maumivu ya kifua ni;

• Shambulio kwenye moyo (mshituko wa moyo)

• Tatizo la woga na wasiwasi – ang’zayati

• Ugonjwa wa gastroesofagio riflux

• Kubana kwa misuli ya kifua

• Nimonia(nyumonia)

• Pumu ya kifua

• Vidonda vya tumbo

• Kuvunjika kwa mbavu

• Kuvimba kwa kongosho

• Shinikizo la juu la damu kwenye mapafu

• Mawe kwenye mfuko wa figo

• Magonjwa mbalimbali ya moyo

• Kutanuka kwa misuli ya moyo kutokana na shinikizo la juu la damu

• Moyo mkubwa(kutanuka kwa moyo)

• Maambukizi kwenye mbavu- kostokondraitizi

• Nyumothoraksi

• Kuziba kwa mshipa ya damu ya moyo (koronari)

• Kifua kikuu (TB)

Kumbuka

Kwa kila kisababishi kilichoorodheshwa hapo juu, zipo dalili zingine ambazo huelezea tatizo halisi, hapa chini dalili zingine zinazoambatana zimeelezewa kulingana na kisababishi halisi cha cha kifua kubana, kuwa kizito na kuwaka moto.

Shambulio kwenye moyo(mshituko wa moyo)

Mtu huyu huwa na dalili zifuatazo;

• Maumivu makali ya katikati ya kifua ya kuchoma au kugandamiza

• Maumivu yanayohamia taya la kushoto begani au mgongoni

• Kifua kuwaka moto

• Maumivu ambayo hubakia kwa dakika chache

• Kichefuchefu

• Kupumua kwa shida

Woga na wasiwasi (aang’zayati)

Mtu huyu huweza kuwa na dalili zifuatazo;

• Kupumua kwa haraka

• Kupumua kwa shida

• Kizunguzungu

• Misuli ya kifua kukaza

Ugonjwa wa gastroesofajio reflaksi (kucheua tindikali)

Ni hali ambayo hutokea pale ambapo Asidi kutoka tumboni hucheuliwa kwenye mrija wa esofagasi na koo, huambatana na dalili zifuatazo;

• Kuhisi kifua kinachoma kama moto

• Kushindwa kumeza

• Kifua kuuma

• Kubadilika kwa sauti

• Maumivu ya katikati ya kifua yasiyohama

Kujongea kwa misuli

Licha ya kupelekea kifua kubana pia huweza kupelekea , maumivu, kuvimba kifua na shida wakati wa kupumua

Nimonia (homa ya mapafu)

Licha ya homa hii kupelekea kifua kubana pia hupelekea;

• Maumivu ya kifua

• Kuchanganyikiwa

• Kukohoa

• Kuchoka

• Homa

• Kichefuchefu

Pumu ya kifua

Pumu- licha ya kupelekea kifua kubana pia husababisha dalili zifuatazo;

• Kupumua kwa shida

• Kukohoa

• Kupumua sauti zenye mlio kama filimbi

Vidonda vya tumbo

Huweza kupelekea kifua kubana na dalili zingine ambazo ni;

• Maumivu ya tumbo yanayochoma

• Kuhisi tumbo kujaa

• Kiungulia ama kuchoma kwa kifua

• Kichefuchefu

Kuvunjika mbavu

Hali hii hupelekea kifua kubana pamoja na dalili zingine kama maumivu kwenye kifua na kuhema kwa shida

Shinikizo la juu la damu la pulmonari

Ni moja ya hali ambayo hupelekea kifua kubana na dalili zingine ambazo ni;

• Kupata shida kupumua

• Kuchoka

• Kizunguzungu

• Kifua kuuma

• Kifua kubana