Dalili za mimba ya miezi mitano

Utangulizi

Mwezi wa tano wa ujauzito hujumuisha wiki ya 17 hadi ya 20. Katika kipindi hiki, wajawazito wengi  hujihisi kuwa na nguvu zaidi na afya njema. Hata hivyo, hatua hii pia huambatana na mabadiliko mbalimbali ya kimwili na kihisia. Kutambua dalili hizi na kuelewa wakati sahihi wa kumwona daktari ni muhimu kwa afya ya mama na mtoto.

Je, ni zipi dalili za mimba ya miezi mitano?

Baadhi ya dalili za kawaida ambazo huweza kujitokeza ni pamoja na:

• Kuongezeka kwa hamu ya kula: Kwa kuwa kichefuchefu mara nyingi hupungua, hamu ya kula huongezeka. Ni muhimu kula chakula chenye virutubisho ili kumsaidia mtoto kukua vizuri bila kula kupita kiasi.

• Matatizo ya mfumo wa mmeng'enyo wa chakula: Mfuko wa uzazi unaposukuma juu, unaweza kusababisha matatizo ya mmeng’enyo wa chakula kama vile kiungulia, gesi, au tumbo kujaa

• Tumbo kukua na kuongezeka kwa uzito: Ifikapo mwezi wa tano, tumbo la mimba huonekana zaidi. Kuongezeka kwa uzito ni jambo la kawaida na linalotarajiwa, kwa kuwa mtoto, kondo la nyuma, na maji ya uzazi yote yanaongezeka.

• Maumivu ya tumbo: Tumbo lako linaweza kuwa na maumivu upande mmoja au mwingine kutokana na ligamenti inayoshikilia mfuko wa uzazi kutanuka.

• Kuhisi mtoto akicheza: Moja ya dalili za kusisimua ni kuhisi mtoto akicheza tumboni. Unaweza kuhisi hisia za kupapasa au kutikisa tumboni, mara nyingi kati ya wiki ya 18 hadi 22

• Mabadiliko ya matiti: Matiti huendelea kukua na kuhisi kuwa mazito au kujaa. Baadhi ya wanawake huanza kuona majimaji ya manjano kutoka kwenye matiti.

• Mabadiliko ya ngozi: Ngozi huweza kupata michirizi, madoa ya kahawia usoni, mstari mweusi tumboni, na maeneo kama chuchu na kwapa kuwa meusi zaidi, hali inayosababishwa na mabadiliko ya homoni na kutanuka kwa ngozi.

• Mabadiliko ya hisia: Ingawa kipindi hiki mara nyingi huhusishwa na utulivu wa kihisia, mabadiliko ya homoni bado yanaweza kusababisha hali ya huzuni au mabadiliko ya ghafla ya hisia.

• Maumivu ya mgongo na mwili: Kwa sababu ya kuongezeka kwa ukubwa wa mfuko wa uzazi na mabadiliko ya mkao, maumivu ya mgongo wa chini na maumivu ya nyonga au miguu yanaweza kutokea. Homoni pia hufanya mishipa na viungo kuwa laini zaidi, hali inayochangia maumivu haya.

Mambo Muhimu ya Kuzingatia

Ili kuhakikisha ujauzito wenye afya katika mwezi wa tano, zingatia yafuatayo:Katika kipindi hiki unaweza kufanya kipimo cha ultrasoundili kuangalia maendeleo ya mtoto.

• Kula mlo kamili wenye madini ya chuma, kalsiamu, na asidi ya foliki

• Fanya mazoezi mepesi kama kutembea, yoga nk, yanaweza kupunguza dalili za maumivu na kusaidia mzunguko wa damu.

• Pumzika vya kutosha na tumia mito kusaidia kupata mkao mzuri wa kulala.

  
  

Je, ni wakati gani unapaswa kumuona daktari?

Ingawa dalili nyingi ni za kawaida, zifuatazo zinapaswa kuripotiwa kwa daktari mara moja:

• Maumivu makali ya tumbo

• Kutokwa na damu ukeni

• Kutokwa maji mengi ukeni

• Kichwa kuuma sana

• Kutokuona vizuri

• Kutohisi mtoto akicheza kama ilivyozoeleka

Wapi utapata maelezo zaidi kuhusu mimba ya miezi mitano?

Ili  kupata maelezo zaidi kuhusu mimba ya miezi mitano bofya hapa.