Swali la msingi
Nina viupele kwenye uume pembeni ya ngozi vimeota kama ngozi lakini haviwashi wala kuuma shida ni nini?
Maelezo ya majibu
Viupele kwenye uume ambavyo haviumi wala kuwasha vinaweza kuwa ishara ya hali au magonjwa tofauti za kiafya. Baadhi ya visababishi ni;
Vipele vya lulu uumeni – Hizi ni vijipele vidogo vya rangi ya ngozi au nyeupe vinavyoonekana kwenye korona ya kichwa cha uume. Ni vya kawaida na si ugonjwa.
Vipele vya Fordyce – Ni tezi ndogo za mafuta ambazo zinaonekana kama vipele vidogo vya njano au nyeupe kwenye ngozi ya uume, vipele hivi huwa havina madhara na si ugonjwa.
Sisti ya tezi mafuta– Hizi ni vivimbe vidogo vya mafuta ambavyo hutokea kwenye ngozi ya uume au sehemu nyingine za mwili.
Sunzua – Viupele vilivyo laini na vyenye umbo kama maua ya koliflawa, vinavyosababishwa na virusi vya HPV.
Vipele Moluskam ambukizi– Hali inayosababishwa na virusi na husababisha vipele vidogo vyenye kijicho katikati.
Mzio au mwitikio wa mzio – Sababu inaweza kuwa sabuni, mafuta au kondomu.
Wakati gani wa kumwona daktari?
Unapaswa kumuona daktari ikiwa unakutana na dalili zifuatazo:
Mabadiliko ya vipele – Ikiwa vipele vinakua, vinabadilika rangi, au vinaongezeka kwa wingi.
Maumivu au usumbufu – Ikiwa vinawasha, vinauma, au vinakuletea hali ya kutokuwa na raha.
Vinatokwa na majimaji au damu – Ikiwa kuna usaha, majimaji, au damu kutoka kwenye vipele.
Uvimbaji au kuwaka moto – Dalili za maambukizi kama uvimbe, wekundu, au joto kwenye ngozi.
Ulijamiiana bila kinga – Ikiwa hujui chanzo cha vipele na umekuwa na mahusiano ya kimapenzi bila kinga, kuna uwezekano wa magonjwa ya zinaa.
Vipele havipotei – Ikiwa vimekaa kwa wiki kadhaa bila kubadilika au vinazidi kuongezeka.
Unapomwona daktari, nini kitatokea?
Daktari ataangalia vipele, kukuuliza kuhusu dalili zako, na ikiwa inahitajika, anaweza kufanya vipimo kama sampuli ya ngozi au vipimo vya damu ili kugundua iwapo kuna maambukizi kama HPV, kaswende, au kirusi HSV.
Nini cha kufanya?
Ikiwa vipele havikui, havikuwashi, na havikusababishwa na hatari yoyote (kama zinaa), unaweza kuvichunguza tu.
Epuka kujikuna au kubonyeza vipele.