Majadiliano na Wataalamu

Maswali ya msingi

Daktari ninashaka kuwa nimepata maambukizi ya VVU baada ya kushiriki mapenzi (siku ya terehe 8/04/2025) na mpenzi wangu tulietengana miaka kadhaa iliyopita. Kwanza tulifanya self test kwa kutumia SD BIOLINE ili kujiridhisha maambukizi kama yapo, awali haikuonesha mistari miwili kwa vipimo vyote, ila baada ya kuwa tumeshamaliza kitendo, wakati naviondoa kipimo chake kilionesha mistari mitatu. Je nikirudia kupima kwa sasa naweza tambua uhalisia? . Pia kwa sasa kuna dalili ambazo si za kawaida kwangu, Adha siku ya pili baada ya kitendo nilihisi kichefuchefu, tumbo halikuwa sawa na kuhisi kukosa hamu ya kula, tangu alhamisi mpaka sasa nahisi maumivu kwenye uume kwa mbele ya kuunguza, lakini pia napata hisia kama kuna vitu vinatoka uumeni hata hivyo, nikiikagua hakuna uchafu wowote. Kwa kuwa nafuatilia sana makala zenu za afya, nilianza kutumia ciprofloxacin mara tu nilipohisi dalili tofauti kwenye uume, ili kuzuia na kuondoa maambukizi kama yatakuwepo. Naomba ushauri wako daktari.

Majibu

Asante sana kwa ujumbe wako wa kina na kwa kutumia makala za ULY CLINIC kwa elimu. Pole sana kwa hali unayopitia ni jambo linaloweza kuleta hofu na mashaka, lakini nafurahi umeamua kuchukua hatua mapema. Ngoja tukayajadili haya kwa utaratibu.

1. Kuhusu Kipimo cha VVU (SD BIOLINE na mistari mitatu)

Kipimo cha SD BIOLINE HIV 1/2 3.0 kawaida huonesha:

• Mstari mmoja (C): Hii inaonesha kuwa hakuna VVU (negative).

• Mistari miwili (C na T): Inaonesha uwepo wa VVU (positive).

• Hakuna mstari au mstari usioeleweka: Kipimo si sahihi.

Mistari mitatu si jambo la kawaida. Inawezekana kuwa kipimo kiliharibika, kilikuwa kimepita muda wa matumizi, au kilisomwa nje ya muda uliopendekezwa. Kipimo kinapaswa kusomwa ndani ya dakika 15–20. Kusoma baada ya muda huo (mfano saa kadhaa baada ya tendo) huweza kuleta "Majibu chanya ya uongo", kwa sababu baadhi ya mistari hujitokeza kwa njia isiyo ya kawaida.

2. Je, ukipima sasa unaweza kupata majibu sahihi ya VVU?

Kwa tarehe uliyosema (08/04/2025), leo ni 12/04/2025, hivyo ni siku 4 tu zimepita. Kipimo cha haraka (kama SD BIOLINE) hakiwezi kugundua VVU ndani ya siku 4 kwa kuwa muda wa "Dirisha la matazamio" (ambapo ni muda wa mwili kuzalisha kingamwili dhidi ya virusi zinazoweza kugunduliwa na vipimo, mara nyingi huwa kati ya wiki 2 hadi 12 ikitegemea na kipimo) bado haujatimia.

Hivyo kwa sasa

• Kipimo hakitaonesha ukweli wa maambukizi mapya.

• Hivyo pima tena baada ya wiki 3 hadi 4, halafu rudia tena baada ya wiki 12 kwa uhakika zaidi.

• Kipimo cha PCR (kupima nakala za virusi moja kwa moja) kinaweza kugundua mapema zaidi (siku 10–14), lakini hupatikana zaidi hospitali kubwa au maabara za kisasa.
  

3. Dalili unazopata sasa zinaashiria nini?

Kichefuchefu, kukosa hamu ya kula, maumivu ya uume, hisia za vitu kutoka uumeni hizi zote hazihusiani moja kwa moja na maambukizi ya VVU katika siku chache za mwanzo, bali zinaweza kutokana na;

• Maambukizi ya njia ya mkojo (UTI).

• Magonjwa ya zinaa (STIs) kama gono au klamidia.

• Msongo wa mawazo unaoathiri mwili kwa ujumla.

Kuhusu ciprofloxacin uliyotumia kujitibu bila ushauri

Ciprofloxacin ni dawa inayotibu baadhi ya U.T.I na magonjwa ya zinaa, lakini si dawa ya kutibu VVU, wala haitibu kila aina ya maambukizi ya zinaa. Isipokuwa kama ulipewa na daktari, kutumia antibayootiki bila vipimo sahihi kunaweza kusababisha usugu wa dawa.

4. Nini cha kufanya sasa?

Hatua muhimu zinazopendekezwa:

1. Nenda kwenye kliniki au hospitali iliyo karibu nawe

• Fanya vipimo vya magonjwa ya zinaa kama Gono, klamidia, Herpes, n.k.

• Fanya kipimo cha kuchunguza mkojo kutathmini U.T.I.

• Pata ushauri wa kitaalamu kuhusu matumizi ya dawa.

1. Pima tena VVU baada ya wiki 3 hadi 4 tangu kushiriki ngono, kisha rudia wiki ya 12 ili kupata uhakika wa mwisho.

2. Kama bado upo ndani ya masaa 72 tangu tendo, unaweza kupewa PEP ambayo ni dawa za kuzuia maambukizi ya VVU baada ya kujianika, lakini ni lazima ianzishwe mapema. Kwa siku 4 kupita, bado inaweza kujadiliwa na daktari nenda haraka leo kama inawezekana.

3. Usitumie tena dawa bila ushauri wa daktari.
   

Hitimisho

Usiwe na hofu kupita kiasi umeshachukua hatua nzuri kwa kujitambua mapema. Lakini hatua muhimu zaidi sasa ni kupata vipimo rasmi, na kufuata ushauri wa wataalamu wa afya.

Rejea za mda hii;

1. World Health Organization. HIV testing services: WHO recommendations. Geneva: World Health Organization; 2019.

2. Centers for Disease Control and Prevention. HIV Testing Overview [Internet]. CDC; 2023 [cited 2025 Apr 12]. Available from: https://www.cdc.gov/hiv/basics/testing.html

3. SD BIOLINE HIV-1/2 3.0 Test [Package Insert]. South Korea: Standard Diagnostics Inc; 2017.

4. Branson BM, Owen SM, Wesolowski LG, Bennett B, Werner BG, Wroblewski KE, et al. Laboratory Testing for the Diagnosis of HIV Infection: Updated Recommendations. Centers for Disease Control and Prevention; 2014.

5. Panel on Antiretroviral Guidelines for Adults and Adolescents. Guidelines for the Use of Antiretroviral Agents in Adults and Adolescents with HIV. Department of Health and Human Services; 2023.

6. Workowski KA, Bachmann LH, Chan PA, Johnston CM, Muzny CA, Park I, et al. Sexually Transmitted Infections Treatment Guidelines, 2021. MMWR Recomm Rep. 2021;70(4):1–187.

7. Tindall B, Cooper DA. Primary HIV infection: host responses and intervention strategies. AIDS. 1991;5(1):1–14.

8. Pilcher CD, Eron JJ, Galvin S, Gay C, Cohen MS. Acute HIV revisited: new opportunities for treatment and prevention. J Clin Invest. 2004;113(7):937–45.

9. Cohen MS, Chen YQ, McCauley M, et al. Prevention of HIV-1 infection with early antiretroviral therapy. N Engl J Med. 2011;365(6):493–505.