Huduma ya kwanza

 

Huduma ya kwanza ni nini?

​

Huduma ya kwanza ni matunzo au msaada wa awali anaopatiwa mwathirika wa janga kabla ya mtaalamu wa afya kuwasili eneo la tukio. Matunzo hayo hulenga kuzuia madhara makubwa yanayoweza kujitokeza, kuokoa maisha au kuharakisha uponyaji kutokea. 

 

Mtu wa umri wowote ule anapaswa kujifunza na kufahamu kuhusu namna ya kutoa huduma ya kwanza ili kuweza kukabiliana na dharura/majanga yanayoweza kujitokeza. Katika sehemu hii utajifunza namna ya kutoa huduma ya kwanza kwenye majanga mbalimbali.

 

Majukumu yako kama mtoa huduma ya kwanza

 

Kwenye dharura, kazi yako kuu ni kutoa huduma sahihi na kwa wakati inayotakiwa kwa mgonjwa kabla ya kuwasili kwa wataalamu wa afya katika eneo la tukio. Hata hivyo utakuwa na kazi zingine za kiongozi ili kuweza kukabiliana na hali iliyojitokeza kwa ufanisi Zaidi. Mfano endapo tukio la dharura limetokea kabla ya kuwasili kwa mtaalamu wa afya¸ wewe kama mtoa huduma ya kwanza utatakiwa kuwaongoza watu walio pembeni yako ili kumsaidia mhanga wa tukio. Utatakiwa kumpa madaraka mtu mmoja kugandamiza mshipa wa damu unaovuja, mwingine kuleta kile na mwingine kufanya kile. Hakikisha unatuliza akili na fanya kazi kwa utulivu wakati huo ukitumia watu walipo kukusaidia kwa kuwapa maelekezo sahihi, kwa wakati sahihi na kwa lugha nzuri.

 

Wakati unaenndelea kutoa huduma ya kwanza, hakikisha unaandika nini ambacho umekifanya kwa rejea ya hapo baadae na pia kuwakabidhi wataalamu wa afya kwa maandishi nini ulichokifanya kwa mhanga wa tukio.

 

Kumbuka kuwa unatakiwa kuchukua tahadhari za kiafya kujikinga dhidi ya hatari ya kupata maambukizi au jeraha wakati unatoa huduma ya kwanza kwa kufuata miongozo ya kuzuia na kudhibiti maambukizi kwa kitiba infection prevention and control- IPC.

 

Majukumu ya mtoa huduma ya kwanza

​

Kiufupi, majukumu ya mtoa huduma ya kwanza ni;

​

• Kuhakikisha usalama wako na wale unaowaagiza

• Kudhibiti tukio kwa mujibu wa taratibu zinazotakiwa

• Kupiga simu kwa wataalamu wa afya au mtoa huuma za dharura kwa wakati unaotakiwa

• Kugawa majukumu kwa watu wanaokuzunguka

• Kumpatia mhanga wa tukio huduma ya kwanza iliyo sahihi na kwa wakati

• Kuandika taarifa ya nini ulichokifanya kwa ajli ya kuipatia timu ya huduma za dharura itakapowasili

• Kufanya makabidhiano ya mgonjwa na na taarifa muhimu kwa mtaalamu wa huduma za dharura atakapowasili

 

Hali na mazingira hatari wakati wa kutoa huduma ya kwanza

​

Mazingira yafuatayo ni hatari wakati wa kutoa huduma ya kwanza

​

• Sehemu yenye magari yanayoenda kwa mwendo kasi

• Barabara inayoteleza

• Eneo lenye joto kali

• Kina kirefu cha maji au maji yanayoenda kwa kasi kubwa

• Kwenye kifaa chenye umeme au waya ambayo upo wazi

• Mgonjwa aliyekunywa pombe au kutumia dawa za kulevya

• Sehemu yenye watu wengi

• Mazingira yenye sumu (kwenye hewa n.k)

• Sehemu yenye damu na majimaji  ya mwili wa mhanga

 

Endapo upo kwenye mazingira haya hakikisha usalama wako kwanza kabla ya kutoa huduma kwa kuvaa vifaa kinga na kumweka majeruhi sehemu salama. Unapomhamisha majeruhi, hakikisha unazingatia kanuni za kuhamisha majeruhi ili kuepuka jeruhi shingo na uti wa mgongo.

​

Kusoma makala hii ama kufahamu kuhusu kutoa huduma ya kwanza hakukupi dhamana ya kufanya huduma ya kwanza mwenyewe, siku zote unatakiwa uwapigie wataalamu wa afya kwa ajili ya msaada zaidi, kwa huduma za dharura tafadhari piga simu namba 112 (kwa Tanzania).

​

Chagua aina ya janga hapo chini kusoma zaidi. Endapo hujapata unachokitafuta, andika unachotaka kwenye boksi juu ya tovuti hii kilichoandikwa 'Tafuta chochote hapa...' na endapo hujapata kabisa wasiliana na daktari wako au  daktari wa ULY CLINIC kupitia namba za simu chini ya tovuti hii kwa msaada zaidi.