Njia za kuongeza damu kwa watoto wa chini ya miaka 3

Kuongeza kiwango cha damu( Haemoglobin) kwa watoto wachanga na wadogo chini ya miaka 3 ni muhimu kwa ukuaji na maendeleo yao. Upungufu wa hemoglobini mara nyingi husababishwa na upungufu wa madini ya chuma, hivyo kuongeza madini haya ni muhimu. Hata hivyo uchaguzi wa njia halisi inategemea kisababishi cha upungufu wa damu ambacho kitagunduliwa na daktari wako. Njia zifuatazo zinaweza kusaidia kuongeza hemoglobini kwa watoto hawa wenye upungufu wa damu kutokana na upungufu wa madini chuma;

Kunyonyesha maziwa ya mama

Maziwa ya mama ni chanzo bora cha virutubisho muhimu, ikiwa ni pamoja na madini ya chuma yanayohitajika kwa utengenezaji wa hemoglobini. Inashauriwa kumnyonyesha mtoto maziwa ya mama pekee kwa miezi sita ya kwanza na kuendelea kunyonyesha hadi miaka miwili au zaidi sambamba na vyakula vingine.

Endapo mtoto hatumii maziwa ya mama anapaswa kutumia maziwa ya kopo yenye madini chuma kwa wingi kwa jinsi utakavyoshauriwa na daktari wako.

Kula vyakula vya ziada vyenye Madini ya Chuma

Baada ya miezi sita, anza kumpa mtoto vyakula vya ziada vyenye madini ya chuma, kama vile:

• Nafaka zisizokobolewa: Dengu, maharage, na mchele wa rangi ya kahawia.

• Mboga za majani: Mboga za kijani kibichi kama spinachi.

• Matunda yaliyokaushwa: Aprikoti na mizambarau.

• Nyama na samaki: Nyama nyekundu na samaki.

• Vidonge vya madini chume: Kwa Jinsi utakavyoshauriwa na daktari wako. Weka vidonge hivi mbali na watoto kuepuka madhara kwake akitumia pasipo usimamizi.

Matumizi ya Vidonge vya Chuma

Vidonge vya chuma vinaweza kusaidia kuongeza kiwango cha hemoglobini. Kwa watoto wadogo,dawa ya matone ya chuma ni rahisi kutumika. Hata hivyo, ni muhimu kutumia vidonge hivi chini ya usimamizi wa daktari ili kuepuka madhara kama kuharisha au kuvimbiwa.

Kuongeza Vyakula vyenye Vitamini C

Vitamini C husaidia mwili kufyonza madini ya chuma vizuri. Ongeza matunda kama machungwa, mapapai, na mboga kama pilipili hoho kwenye lishe ya mtoto.

Kuepuka Vyakula Vinavyozuia Ufyonyaji wa Chuma

Epuka kumpa mtoto chai, maziwa mengi au kahawa, kwani vinaweza kuzuia ufyonzaji wa madini ya chuma mwilini. Kwa hivyo, ni muhimu kupunguza matumizi ya vyakula hivi wakati wa matibabu ya upungufu wa chuma.

Kushauriana na Mtaalamu wa Afya

Ikiwa mtoto ana dalili za upungufu wa hemoglobini kama vile uchovu, ngozi ya rangi ya kijivu, au upungufu wa hamu ya kula, ni muhimu kumwona mtaalamu wa afya kwa uchunguzi na ushauri zaidi.

Hitimisho

Kufuata mapendekezo haya kunaweza kusaidia kuongeza kiwango cha hemoglobini kwa watoto chini ya miaka 3 na kuhakikisha wana afya bora na ukuaji mzuri.