Ukweli kuhusu mzunguko wa hedhi wa siku 28

Wanawake wengi wamejifunza vibaya kuwa mzunguko wa hedhi wa kawaida ni siku 28 hivyo unapokuwa tofauti na huyo huwa na wasiwasi na hofu ya kuwa si kawaida.

Mzunguko wa hedhi unaweza kutofautiana kati ya mzunguko mmoja na mwingine na baina ya mwanamke mmoja na mwingine.

Tafiti zilizofanyika kwa wanawake 600,000 zimeonyesha kuwa wanawake 65 kati ya 100 huwa na mzunguko wa hedhi wa kati ya siku 25 hadi 30 na wanawake 13 tu kati ya 100 huingia hedhi ya siku 28.

Idadi hiyo inamaanisha kuwa ni wanawake wachache sana huwa na mzunguko wa hedhi wa siku 28.

Majibu ya tafiti hii yanabidi kukutoa hofu na kukupa ukweli ya kuwa mzunguko wako wa hedhi ni wa kawaida endapo upo ndani ya siku 21 hadi 32. Hauna haja ya kutafuta matibabu kama utakuwa ndani ya siku hizo.

Je, ni kawaida kuwa na mzunguko wa hedhi wa nje ya siku 21 hadi 32?

Ndio, kila binadamu ameumbwa kwa utofauti na ana mwitikio wa utofauti, hii ndio maana tafiti zinaonyesha kuwa kuona ndani ya siku 21 hadi 32 ni wastani tu, huenda endapo tafiti zingefanyika kwa watu wote duniani, wanawake wengi wanaoenda nje ya muda huu wangetambulika. Jambo la msingi kuzingatia ni kama kuna tatizo jingine la kiafya linalosababisha kuchelewa au kuwahi kwa mzunguko wa hedhi. Endapo uchunguzi umedanyika na hakuna tatizo lolote ama dalili zozote za ugonjwa katika mwili, ondoa hofu na amini kuwa mzunguko wako wa hedhi ni wa kawaida hata ukiwa nje ya muda huo.

Ukweli huu una madhara gani?

Kufahamu kuwa mzunguko wa hedhi huwa si wa siku 28 kwa wanawake wengi na kwamba huwa unabadilika badilika kati ya mwezi hadi mwezi hii inatoa sababu ya kwamba, wanawake wengi pia hawawezi kushika ujauzito katika siku za hatari ambazo zinaendana na siku 28 kama ilivyozoeleka.

Inashauriwa endapo unataka kushika ujauzito, shiriki ngono bila kinga bila kujali ni siku ya hatari au la ili kwendana na mabadiliko ya mzunguko wa hedhi ambayo huweza kutokea kila mwezi.

Madhara mengine ni kuhusu tarehe ya kujifungua ambayo mahesabu yake huzingatia idadi ya siku katika mzunguko wa hedhi, wataalamu wengi na wagonjwa huwa wanatumia mzunguko wa siku 28 kama rejea badala ya kutafuta wastani wa siku katika mzunguko wa hedhi kwa kusoma mzunguko wa mama kwa angalau miezi mitatu iliyopita.

Ushauri wa kufahamu idadi ya siku katika mzunguko wako wa hedhi

Ili kufahamu idadi ya siku katika mzunguko wako wa hedhi unapasa kutumia kalenda yako ya kila mwezi, chora duara siku ya kwanza unapoanza kuona hedhi moja na mara utakapoanza kuona hedhi inayofuata na endelea mpaka utakapofikisha miezi angalau mitatu. Wastani wa miezi utakayochora utakuwa wastani wa siku katika mzunguko wako wa hedhi. Wastani huu utasema tu kwamba kwa ujumla unaingia hedhi baada ya siku ngapi lakini unaweza kubadilika muda wowote.