Uzazi wa mpango baada ya kujifungua

Matokeo ya ujauzito unaofuata yanaweza kuwa bora zaidi endapo utasubiri kwa angalau miezi 6 kabla ya kubeba ujauzito mwingine, lakini inapendekezwa kusubiri miezi 18 baada ya kujifungua. Hivyo unapaswa kuanza kutumia uzazi wa mpango kabla ya kuanza tena kushiriki ngono.

Kwa mwanamke ambaye hanyonyeshi, uovuleshaji unaweza kutokea wiki 4 hadi 6 baada ya kujifungua, hata hivyo, unaweza kutokea mapema zaidi. Wakati wanawake wanaonyonyesha huchelewa kuanza uovuleshaji na hedhi, mara nyingi karibu miezi 6 baada ya kujifungua, na wachache wao hupata hedhi mapema, na wanaweza kupata mimba kwa haraka sawa na wale wasionyonyesha. Hivyo bado kuna umuhimu wa kutumia njia ya uzazi wa mpango inayoaminika.

Mambo ya kuzingatia kabla ya kuamua njia ya uzazi wa mpango baad aya kujifungua

Kabla ya kuchagua njia ya uzazi wa mpango ni lazima kujua kama utanyonyesha au hutanyonyesha mtoto wako, na ikiwa unatarajia kupata ujauzito mwingine au umemaliza uzazi. Mambo haya ni ya muhimu kwani wewe na mwenza wako mnapaswa kuchagua njia ya uzazi wa mpango kulingana na ya uchaguzi wa bjia husika. Mambo haya yameelezewa hapa chini;

Kwa mwanawake anaonyonyesha

Njia  zisizo za homoni na njia za homoni progesterone pekee hupendekezwa zaidi kwa sababu haziathiri uzalishaji wa maziwa, unaweza kutumia njia zifuatazo;

• Vidonge vya uzazi wa mpango vyenye projestini pekee

• Sindano za depo medroxyprogesterone acetate

• Vipandikizi vya projestini

• Vifaa vya ndani ya kizazi (IUD)

Kwa mwanamke ambaye hanyosheshi

Unaweza kutumia njia zilizo na zisizo na homoni kwani hakuna hofu ya kupungua kwa uzalishaji wa maziwa, njia zifuatazo zinaweza kutumika;

• Vidonge vya uzazi wa mpango vyenye mchanganyiko wa estrojeni na projestini

• Pete za uke zenye mchanganyiko wa estrojeni na projestini

  
  

Kwa mwanawake aliyemaliza uzazi

Endapo wewe na mwenza wako hamna mpango wa kupaya watoto tena mnaweza kuchagua kufunga uzazi kwa njia ya upasuaji wa kufunga mirija ya falopia. Upasuaji huu unaweza kufanywa mara baada ya kujifungua, wakati wa upasuaji wa kujifungua, au siku miezi kadhaa baada ya kujifungua. Mwanaume pia anaweza kufanya upasuaji wa kufunga mirija ya uzazi endapo itakuwa uchaguzi wenu.

Ushauri wa kitaalamu kabla ya kuchagua njia

Ili kuhakikisha kuwa mama anachagua njia salama na inayofaa ya uzazi wa mpango, anapaswa kushauriana na mtoa huduma wa afya ili kupata taarifa sahihi kuhusu chaguzi mbalimbali. Ni muhimu kujadili hatari na faida za kila njia kulingana na hali yako ya kiafya, ikiwa ni pamoja na magonjwa kama shinikizo la damu, kisukari, au historia ya matatizo ya kuganda kwa damu, kwani baadhi ya njia zinaweza kuwa na athari kwako.

Aidha, unapaswa kujua muda sahihi wa kuanza kutumia njia uliyoichagua, kwani baadhi zinaweza kuanza kutumika mara moja baada ya kujifungua, ilhali nyingine zinahitaji kusubiri kwa muda fulani. Pia, ni vyema ujadiliane na mwenza wako, ikiwa inapendelewa, ili kuhakikisha maamuzi ya uzazi wa mpango yanaungwa mkono na familia kwa urahisi wa utekelezaji. Mwisho, mama unapaswa kuelewa kwa kina jinsi ya kutumia njia uliyochagua ili kuhakikisha inafanya kazi kwa ufanisi wa hali ya juu.

Hitimisho

Uzazi wa mpango baada ya kujifungua ni muhimu kwa afya ya mama na mtoto, huku uchaguzi wa njia ukitegemea kunyonyesha na mipango ya uzazi. Wanawake wanaweza kutumia njia zisizo za homoni, projestini pekee, au mchanganyiko wa estrojeni na projestini kulingana na hali yao.